Ինչի մասին է «Վճարիր ուրիշին» ֆիլմը.
Ֆիլմի գլխավոր հերոս Տրեվորն ընդամենը տասնմեկ տարեկան է, սակայն արդեն իսկ հասցրել է առնչվել կյանքի մութ ու դաժան դրսևորումների հետ: Գուցե զարմանալի է, բայց նման փորձը չի զրկել նրան հուսալու ու հավատալու կարևոր ունակություններից, ինչն էլ հենց հիմք է հանդիսանում վերջինիս ուտոպիստական գաղափարների համար: Երեխան ինքնամփոփ է, նրբանկատ, խոցելի, բայց համառ: Ինչպես նաև ակնհայտ է նրա հասունությունը հասակակիցների հետ համեմատության մեջ, ինչն էլ, թերևս, պատճառ է դառնում ուսուցչի՝ «Ի՞նչ է սպասում աշխարհը քեզնից» «Ինչպե՞ս ես դու այն փոխում» հարցերն այլ կերպ ընկալելու ու ավելի լայնախոհ պատասխաններ փնտրելու համար: Առաջադրանքը ստանալուն պես՝ հերոսի մոտ առաջ է գալիս աշխարհն ավելի լավը դարձնելու սևեռուն գաղափարը, և նա մշակում է հստակ ծրագիր: Եվ, իրոք, մի՞թե յուրաքանչյուրիս մտքով երբևէ չի անցել որևէ կերպ դարձնել աշխարհն ավելի լավը:
